Amanzholov University ұйытқы болуымен VII облыстық "Абай оқулары – 2022" байқауы өтті, деп хабарлайды Сәрсен Аманжолов атындағы ШҚУ баспасөз қызметі.

 

Биыл қатысуға ниет білдіргендер саны көп. Аймақтың барлық қала-аудандарының 10-11 сынып оқушылары қамтылып, 63 үміткер сынға түсті. Онлайн сайыс қазақтың бас ақыны – Абайдың шығармашылығын қамтитын 3 кезеңнен тұрды: көркем мәнерлеп оқу, ақын шығармашылығы бойынша тапсырмалар және «Абайдын қара сөздері» бойынша сұрақтар.
Аманжолов университетінің ректоры Мұхтар Төлеген қатысушыларды құттықтап, сәттілік тіледі.

- Аристотельден кейін әлемде екінші ұстаз болып Әл-Фараби саналады, ал қазақтың ең танымал ақыны — Абай Құнанбаев. Олардың еңбектері әлі күнге дейін бүкіл әлемде оқылады. Баршаңызға осы байқауға сәттілік тілеймін және біз Сіздерді Amanzholov University студенттері ретінде көруге әрқашан қуаныштымыз. Біздің университет сіздер үшін екінші үй және болашаққа маңызды қадам болады, – деді ректор.

Абайтанушы ғалым Айжан Қартаева қатысушылардың қарымын жоғары бағалады. Дегенмен, ұлы ойшылдың мұрасына ден қойып, Абай оқуларына қатысудың өзі үлкен жауапкершілік,- дейді ол. 

- Балаларда үлкен құлшыныс бар. Барлығы білім грантын алып, біздің университеттің студенті болғысы келді. Сондықтан оқушылар жақсы дайындалған. Біз білім алушыларға жыл сайын Абай оқуларына қатысуды ұсынамыз:һ, өз күштерін сынап көруді, өз білімдерін көрсетуге кеңес береміз, – деді С.Аманжолов атындағы ШҚУ "Абайтану" ғылыми-зерттеу институтының директоры Айжан Қартаева.

Бас жүлдені Абай ауданы Кеңгірбай би ауылының Шәкәрім атындағы орта мектебінің 11 сынып оқушысы Аружан Кәріпбай жеңіп алды. Екінші орынды Риддер қаласының №14 орта мектебінің 10 сынып оқушысы Алтынай Болатова мен Абай ауданы Қарауыл ауылының Абай атындағы мамандандырылған мектеп – гимназиясының 10 сынып оқушысы Айзере Манарбекова иеленді. Үшінші орынды Өскемен қаласындағы дарынды балаларға арналған Жамбыл атындағы облыстық мамандандырылған мектеп – гимназия интернатының 11 сынып оқушылары, сондай-ақ Көкпекті ауданының Әуезов атындағы орта мектебінің оқушылары Асылым Мұратова мен Сұңқыла Аманбек иеленді.